Mat 24:15-25 | YomNWM | STEP | —Diawu thangu luela mona mbungi wowo wuyolukila mbikudi Danieli, telimini va buangu kinlongo, mutu wowo wulembo tangi bika kasudika

Matthew 24:15-25

(Malako 13.14-23 ; Luka 21.20-24)

15 —Diawu thangu luela mona mbungi wowo wuyolukila mbikudi Danieli, telimini va buangu kinlongo, mutu wowo wulembo tangi bika kasudika 16 buna boso batu bela batakana mu tsi Yuda batinina ku miongo. 17 Woso mutu widi ku mbata muanzu, kabika kuluka mu diambu kabonga bima bidi mu nzoꞌandi. 18 Woso mutu wela batakana mu tsola kabika buela vutuka ku manima mu bonga yunga kiandi.

19 Mabienga mela ba mu bilumbu bina kuidi baketo bela ba mu buemba ayi kuidi bobo bela yemika. 20 Lusambila muingi lumbu beni kioki luela tina kibika ba mu thangu kiozi kingolo voti mu lumbu ki saba. 21 Bila ziphasi beni ziela ba zingolo, nkutu ziphasi zina zibedi ko tona thonono nza nate buabu ayi ziphasi zi phila yina zilendi buela ba ko. 22 Enati Pfumu kasia baka ko lukanu lu kufisa bilumbu beni, nganu kadi mutu wumosi kalendi vuka ko. Vayi wela kufisa biawu mu diambu di batu bobo kasobula.

(Malako 13.24-31 ; Luka 17.23-24 ; 21.25-31)

23 Enati mutu wulukembi : “Lutala ! Klisto widi vava”, voti “widi kuna”, lubika kunwilukila. 24 Bila Baklisto ba luvunu ^{▼▼Baklisto ba luvunu : bawu bobo beti kukidedikasa banga Klisto.} ayi mimbikudi mi luvunu miwombo miela totuka ayi bela vanga bidimbu binneni ayi bikumu bi tsisi muingi babaka bu vunina enati baka bubela, batu bobo Nzambi kasobula. 25 Tala, ndilulubudi.